Gullin í grenndinni

Skógurinn sem námsvettvangur

Gullin í grenndinni hófst hjá Krakkaborg og Flóaskóla árið 2019. Verkefnið tengir saman skólastig með útinámi og skógrækt, meðal annars í Skagási.

Við lærum með því að gera

Í verkefninu hafa nemendur meðal annars gróðursett tré, kynnst grisjun og lært um hlutverk skóga í kolefnisbindingu. Náttúran gefur tækifæri til rannsókna, samvinnu og skapandi viðfangsefna.

Tengsl við náttúru og samfélag

• Að kynnast lífríkinu og skilja betur tengsl þess við umhverfið.
• Að sýna náttúrunni virðingu og taka þátt í umhverfisvernd.
• Að upplifa ánægju af útiveru og eigin þátttöku.
• Að efla tengsl milli nemenda leik- og grunnskóla.

Samstarf skólastiganna

Elstu nemendur Krakkaborgar og nemendur 1. bekkjar Flóaskóla hittast í skógræktinni við Skagás og vinna saman að fjölbreyttum verkefnum. Miðað er við fimm til sex samverustundir yfir skólaárið. Nemendur 2. bekkjar geta einnig tekið þátt í einhverjum tilvikum.

Áhersla er lögð á náttúrufræði, umhverfisvitund og náttúruvernd. Nemendur kynnast skógrækt, kolefnisbindingu og ólíkum vistkerfum. Sameiginleg verkefni, meðal annars vinna við gönguleiðir og merkingar, gefa þeim færi á að læra með því að gera.

Samstarfsaðilar verkefnisins eru Flóahreppur, Skógræktarfélag Árnesinga og Skógræktarfélag Villingaholtshrepps.

Umsjón með útinámi

Ída Bjarnadóttir

Ída er sérgreinastjóri Krakkaborgar og hefur umsjón með Gullunum í grenndinni, öllum skógarferðum og útinámi leikskólans.